గ్రూప్-1 పరీక్ష రాసిన 121 మందికి 100 మార్కులు… ముగ్గురు ఉద్యోగులు అరెస్టు
టీఎస్పీఎస్సీ పేపర్ లీకేజీలో సిట్ దూకుడు పెంచింది. పలు కీలక విషయాలను సేకరించింది. ఈ కేసుతో సంబంధమున్న ముగ్గురు టీఎస్పీఎస్సీ ఉద్యోగులను అరెస్ట్ చేసింది. మరోవైపు కమిషన్లోని 40మంది ఉద్యోగులకు సిట్ నోటీసులు జారీ చేసింది. పేపర్ లీకేజీలో కోచింగ్ సెంటర్లకు కూడా సంబంధముందని అనుమానిస్తోంది.
రాష్ట్రవ్యాప్తంగా సంచలనం సృష్టిస్తున్న టీఎస్పీఎస్సీ ప్రశ్నాపత్రాల లీకేజీ వ్యవహారం.. రోజుకో మలుపు తిరుగుతోంది. సిట్ దర్యాప్తులో విస్తుపోయే వాస్తవాలు వెలుగులోకి వస్తున్నాయి. గ్రూప్-1లో 121 మంది విద్యార్థులకు 100 మార్కులు వచ్చినట్లు సిట్ దర్యాప్తులో తేలింది. ఆరురోజుల కస్టడీలో భాగంగా 9 మంది నిందితులను విచారిస్తున్న సిట్.. పలు కీలక ఆధారాలు రాబట్టింది. రేణుక, డాక్యానాయక్ కాల్ డేటాను పరిశీలించగా.. అభ్యర్థులు, కోచింగ్ సెంటర్ నిర్వాహకులతో మాట్లాడినట్లు అధికారులు గుర్తించారు. కమిషన్లోని 10 మందితో పాటు, మరో 40 మంది సభ్యులకు సిట్ తాజాగా నోటీసులు జారీ చేసింది. కోచింగ్ సెంటర్ నిర్వాహకులకు, అభ్యర్థులకు కూడా నోటీసులు ఇచ్చే యోచనలో సిట్ ఉన్నదని సమాచారం.
టీఎస్పీఎస్సీ నుంచి 20 మంది పరీక్ష రాస్తే.. అందులో ఇద్దరికి 100కు పైగా మార్కులు వచ్చినట్లు సిట్ అధికారులు గుర్తించారు. టీఎస్పీఎస్సీ ఉద్యోగి రమేష్‌కు, మహిళా ఉద్యోగినికి సైతం 100కు పైగా వచ్చినట్లు సిట్ అధికారులు తెలుసుకున్నారు. ఈ ఆధారాలతో కమిషన్లోని రమేష్, షమీమ్, సురేష్లను నిందితులుగా చేర్చి.. వీరిపై కేసు నమోదు చేశారు. ఈ ముగ్గురిని రేపు కోర్టులో హాజరుపర్చే అవకాశం ఉన్నట్లు సమాచారం
గ్రూప్-1 ప్రిలిమ్స్ పరీక్షలో 121 మందికి మాత్రమే నూరుకు పైగా మార్కులు వచ్చాయని సిట్ దర్యాప్తులో తెలిసింది. టీఎస్పీఎస్సీ కమిషన్ నుంచి గ్రూప్-1 రాసిన అభ్యర్థుల్లో కేవలం ఇద్దరికి మాత్రమే 100 మార్కులు వచ్చాయని పేర్కొన్నారు.
ఈ కేసులో దర్యాప్తు చేస్తున్న సిట్కు.. టీఎస్పీఎస్సీ కమిషన్లో 20 మందికిగానూ, 8 మంది మెయిన్స్కు అర్హత సాధించినట్లు గుర్తించారు. ఈ ముగ్గురి చేరికతో ప్రశ్నాపత్నం లీకేజీ కేసులో నిందితుల సంఖ్య 12కు చేరుకుంది.