సాఫీగా సాగిపోతున్న జీవితాలను అనుకోని ఘటనలు విషాదంలోకి నెడుతూ ఉంటాయి. అప్పటి వరకు ఎంతో సంతోషంగా ఉన్నవారు విధి ఆడిన వింత నాటకంలో బలైపోతూ ఉంటారు. అలాంటి విషాదకర ఘటనే నిజామాబాద్ జిల్లాలో చోటు చేసుకుంది. జిల్లాలోని మోర్తాడ్ మండలం దొన్కల్కు చెందిన లక్ష్మి తన కుమూరుడు, కుమార్తెల కుంటుంబాలతో కలిసి మెుక్కులు చెల్లించుకునేందుకు బడా భీమ్గల్ ఎల్లమ్మ ఆలయానికి వెళ్లారు. మంగళవారం మెుక్కులు చెల్లించుకొని కారులో ఇంటికి తిరుగు ప్రయాణమయ్యారు.
ఆ కారులో లక్ష్మీ కుమారుడు, కోడలు, వారి ఇద్దరు పిల్లలు, కూతురు, అల్లుడు కలిపి మొత్తం ఏడుగురు ప్రయాణిస్తున్నారు. భీంగల్లోని విద్యుత్ ఉపకేంద్రం వద్దకు రాగానే వారికి అనుకోని రీతిలో మృత్యువు ఎదురైంది. ట్రాక్టర్ ట్రాలీపై తీసుకెళ్తున్న ఓ పొక్లెయిన్ (JCB) ప్రమాదవశాత్తు లక్ష్మీ కుటుంబం ప్రయాణిస్తున్న కారుపై పడింది. ఈ ప్రమాదంలో కారు నుజ్జునుజ్జుకాగా.. అందులో ప్రయాణిస్తున్న ఇద్దరు అక్కడికక్కడే మృతి చెందారు. మరొకరు ఆసుపత్రిలో చికిత్స పొందుతూ మరణించారు.
ప్రమాదాన్ని గమనించిన స్థానికులు వెంటనే పోలీసులకు సమాచారం అందించారు. ఘటనాస్థలానికి చేరుకున్న పోలీసులు.. కారులో ఇరుకున్న వారిని బయటకు తీసేందుకు తీవ్రంగా శ్రమించారు. సుమారు గంటపాటు శ్రమించి కారులోని మృతదేహాలను బయటకు తీశారు. ప్రమాదంలో లక్ష్మీ కుమారుడు ముప్పారపు రాజేశ్వర్, కోడలు జ్యోతి, కుమార్తె రమ మృతి చెందగా.. అల్లుడు, ఇద్దరు మనవళ్లు గాయపడ్డారు. వారిని సమీప ఆసుపత్రికి తరలించి చికిత్స అందిస్తున్నారు.
అనుకోనిరీతిలో ఎదురైన మృత్యువు కారణంగా రాజేశ్వర్, జ్యోతి మరణించగా.. వారి ఇద్దరు పిల్లలు అనాథలయ్యారు. తల్లిదండ్రుల మృతి వార్త తెలిసి పిల్లలిద్దరూ బోరను విలపించారు. ఆ దృష్యాలు స్థానికులను కంటతడిపెట్టించాయి. ప్రస్తుతం లక్ష్మీ, ఆమె అల్లుడు, ఇద్దరు పిల్లల ఆరోగ్యం మెరుగ్గానే ఉందని వైద్యులు తెలిపారు. ఘటనపై పోలీసలుు కేసు నమోదు చేసుకొని దర్యాప్తు చేస్తున్నారు. ఎదురుగా వచ్చిన కారుపై జేసీబీ ఎలా పడిందనే దానిపై పోలీసులు ఆరా తీస్తున్నారు. కారు ట్రాక్టర్ ట్రాలీని ఢీకొట్టిందా? అనే కోణంలో పోలీసులు విచారణ చేపట్టారు.