బయటపడిన అక్రమార్కుడు బాలకృష్ణ అతి తెలివి.. సంబంధం లేని వ్యక్తులను బినామీలుగా పెట్టుకుని వందల కోట్ల ఆస్తులు!
బాలకృష్ణ నివాసంలో రెండు రోజులపాటు ఏసీబీ తనిఖీలు.
గుట్టలకొద్దీ అక్రమాలు వెలుగులోకి.
మరిన్ని ఆధారాలు సేకరిస్తున్న అధికారులు.బినామీలతో ప్రత్యేకంగా ఓ యంత్రాంగాన్ని ఏర్పాటు చేసుకున్న అవినీతి కొండ.
ఆదాయానికి మించిన ఆస్తుల కేసులో ఇటీవల అరెస్ట్ అయిన రియల్ ఎస్టేట్ రెగ్యులేటరీ అథారిటీ (రెరా) కార్యదర్శి బాలకృష్ణ అతి తెలివి చూసి అధికారులు ముక్కున వేలేసుకున్నారు. వందల కోట్ల రూపాయల అక్రమాస్తులు సంపాదించిన ఆయన ఎవరికీ ఎలాంటి అనుమానం రాకుండా సంబంధం లేని వ్యక్తులను బినామీలుగా పెట్టుకున్నాడు. అవినీతి నిరోధకశాఖ అధికారులు బుధవారం హైదరాబాద్‌ పుప్పాలగూడలోని సెక్రటేరియట్ కాలనీలోని బాలకృష్ణ నివాసంలో జరిపిన సోదాలు నిన్నటి వరకు కొనసాగాయి. వందకోట్ల రూపాయలకు పైగా ఆస్తులు, కేజీల కొద్దీ వెండి, బంగారం తనిఖీల్లో బయటపడ్డాయి. దీంతో ఆయనను అరెస్ట్ చేసిన అధికారులు బినామీ ఆస్తులపై దృష్టి సారించి ఆ దిశగా దర్యాప్తు మొదలుపెట్టారు. ఈ క్రమంలో మరిన్ని సంచలన విషయలు వెలుగులోకి వచ్చినట్టు తెలుస్తోంది.
డ్రైవర్ పేరిట రూ. 20 కోట్ల ఆస్తులు…
బాలకృష్ణ డ్రైవర్ పేరిట నగర శివార్లలో రూ. 20 కోట్లకుపైగా విలువైన భూములు ఉన్నట్టు గుర్తించారు. అలాగే, తనపై ఎవరికీ ఎలాంటి అనుమానం రాకుండా సంబంధం లేని వ్యక్తులను బినామీలుగా పెట్టుకుని ఆస్తులు కూడబెట్టినట్టు గుర్తించారు. పలు జిల్లాల రిజిస్ట్రేషన్ కార్యాలయాలు, ఉద్యోగులు, బ్యాంకు లాకర్ల నుంచి ఆధారాలు సేకరిస్తున్నారు. ఆధారాలను బట్టి ఈ కేసుతో సంబంధం ఉన్న వారిపై చర్యలు తీసుకునేందుకు అధికారులు రెడీ అవుతున్నారు. బినామీల్లో ఒకరు ఉమ్మడి కరీంనగర్ జిల్లాలో ఉన్నట్టు గుర్తించి వివరాలు సేకరిస్తున్నారు. కాగా, హెచ్ఎండీఏ పరిధిలో ఏ పని జరగాలన్నా తొలుత ఆయన బినామీలను సంప్రదించాకే అధికారుల వద్దకు వెళ్లేలా బాలకృష్ణ ప్రత్యేకంగా ఓ యంత్రాంగాన్ని ఏర్పాటు చేసుకున్నట్టు కూడా విచారణలో తేలింది.