తెలంగాణలో రైతుల పంట రుణాల మాఫీ ప్రక్రియను రేవంత్ రెడ్డి ప్రభుత్వం ప్రారంభించింది. మూడు దఫాలుగా.. చేయనున్న ఈ రుణమాఫీని ఆగస్టు 15 లోపు ప్రభుత్వం పూర్తి చేసందుకు ప్రణాళికలు రచించింది.
ఇందులో భాగంగా.. ఈరోజు లక్ష రూపాయల మేర రుణాలు ఉన్న రైతుల అకౌంట్లతో డబ్బు జమ చేసింది. ఈ క్రమంలో.. రైతులంతా ఆనందం వ్యక్తం చేస్తుండగా.. బీఆర్ఎస్ వర్కింగ్ ప్రెసిడెంట్ మాత్రం కీలక వ్యాఖ్యలు చేశారు. రుణమాఫీ పేరుతో.. మరోసారి రైతులను రేవంత్ రెడ్డి సర్కార్ మోసం చేస్తోందని కేటీఆర్ ఆరోపించారు. ఈ మేరకు ట్విట్టర్ వేదికగా ఆసక్తికర పోస్ట్ పెట్టారు.
రైతు రుణమాఫీ అని రేవంత్ రెడ్డి సర్కార్ అన్నదాతలను మోసం చేస్తోందని కేటీఆర్ తెలిపారు. రైతుబంధు కింద జూన్ నెలలో ఇవ్వాల్సిన నిధుల్లో నుంచే 7000 కోట్లను రుణమాఫీకి మళ్లించారని ఆరోపించారు. హక్కుగా రావాల్సిన రైతుబంధు డబ్బు నుంచి కొంతమొత్తం విదిల్చి.. రుణమాఫీ చేస్తున్నామంటూ పోజులు కొడుతున్నారంటూ కేటీఆర్ పేర్కొన్నారు. 40 లక్షలకు పైగా రైతులు లక్ష రూపాయల వరకు రుణాలు తీసుకుంటే కేవలం 11 లక్షల మందినే ఎలా ఎంపిక చేస్తారంటూ కేటీఆర్ నిలదీశారు.
2014, 2018లో కేసీఆర్ సర్కార్ చేసిన రుణమాఫీతో పోలిస్తే.. రేవంత్ రెడ్డి సర్కారులో కేవలం పావు వంతు రైతులకే అర్హతనా అంటూ కేటీఆర్ ప్రశ్నించారు. 2014లోనే కేసీఆర్ సర్కార్ లక్షలోపు రుణాలను మాఫీ చేయడానికి 16 వేల 144 కోట్లు వెచ్చించి సుమారు 35 లక్షల మంది రైతులకు లబ్ధి చేకూర్చిందని పేర్కొన్నారు. ఇక.. 2018లో అదే లక్షలోపు రుణమాఫీకి 19 వేల198 కోట్లు అంచనా కాగా.. మొత్తం లబ్దిదారుల సంఖ్య సుమారు 37 లక్షలు అని చెప్పుకొచ్చారు. కాంగ్రెస్ మానిఫెస్టోలో హామీ ఇచ్చినట్టుగా.. 2 లక్షల వరకు ఉన్న పంట రుణాలన్ని వెంటనే మాఫీ చేయాలని కేటీఆర్ డిమాండ్ చేశారు. అర్హులైన రైతులందరికీ రైతుబంధు విడుదల చేయాలని డిమాండ్ చేశారు కేటీఆర్.