తెలంగాణ సర్కార్ మాస్టర్ ప్లాన్..
హైదరాబాద్‌లోని ఈ ప్రాంతాల్లో పెరగనున్న భూములు, ఇళ్ల ధరలు
హైదరాబాద్ మహానగరం నలుమూలల విస్తరిస్తోంది. తాజాగా తెలంగాణ ప్రభుత్వం మరో కీలక ప్రకటన చేసింది. సైబరాబాద్ తరహాలో ముచ్చర్లలో మరో కొత్త నగరాన్ని నిర్మిస్తామని ప్రకటించింది. బెగరికంచ ప్రాంతంలో స్కిల్ యూనివర్సిటీ నిర్మాణానికి సీఎం రేవంత్ రెడ్డి శంకుస్థాపన చేశారు. తెలంగాణ సర్కార్ తీసుకున్న నిర్ణయంతో హైదరాబాద్‌లోని పలు ప్రాంతాల్లో భూములు, ఇళ్ల ధరలు ఒక్కసారిగా పెరగనున్నాయి. మరి ఆ ప్రాంతాలు ఏంటి, అక్కడ ప్రభుత్వం ఎలాంటి కార్యక్రమాలు చేపట్టనుంది? అనేది ఓసారి తెలుసుకుందాం. తెలంగాణ రాష్ట్ర రాజధాని హైదరాబాద్ వేగంగా అభివృద్ధి చెందుతోంది. ఒకప్పుడు హైటెక్ సిటీ, మాదాపూర్, కూకట్‌పల్లి వంటి పేర్లు ప్రధానంగా వినిపించేవి. కానీ, ఇప్పుడు నగరం నలుమూలల్లోని ప్రాంతాలు వేగంగా అభివృద్ధి చెందుతున్నాయి. మౌలిక సదుపాయాలు, రవాణా సౌకర్యాలు అందుబాటులోకి వస్తున్న క్రమంలో అన్ని వైపులా భూములు, ఇళ్లకు మంచి డిమాండ్ ఉంది. తాజాగా తెలంగాణ ప్రభుత్వం మరో పెద్ద ప్రాజెక్టు చేపట్టేందుకు సిద్ధమైంది. అసెంబ్లీలో బుధవారం ద్రవ్య వినిమయ బిల్లుపై చర్చ సందర్భంగా ముఖ్యమంత్రి రేవంత్ రెడ్డి కీలక ప్రకటన చేశారు. హైదరాబాద్, సికింద్రాబాద్, సైబరాబాద్ వంటి మూడు నగరాలకు ధీటుగా మరో నగరాన్ని నిర్మిస్తామని తెలిపారు. అందుకు ముచ్చర్లను ఎంచుకున్నట్లు తెలిపారు.
నాలుగో నగరం..
రంగారెడ్డి జిల్లా ముచ్చర్లలో దాదాపు 4 వేల ఎకరాల్లో కొత్త నగరాన్ని నిర్మిస్తామని అసెంబ్లీ వేదికగా సీఎం రేవంత్ రెడ్డి ప్రకటించారు. అక్కడ ఆరోగ్య, క్రీడా హబ్‌లు ఏర్పాటు చేయడంతో పాటు మెట్రోతో అనుసంధానం చేస్తామన్నారు. వ్యవసాయం నుంచి ఆర్టిఫిషియల్ ఇంటెలిజెన్స్ వరకు వివిధ రంగాలపై నూతన విధానాలు రూపొందిస్తామని తెలిపారు. ముచ్చర్లలో నిర్మించే నగరంలో వైద్య సేవల నుంచి ఉపాధి వరకు లభించే ప్రణాళికలు సిద్ధం చేస్తామని, అక్కడ క్రికెట్ స్టేడియం నుంచి గోల్ఫ్ కోర్స్ వరకు ఏర్పాటు చేస్తామన్నారు.
భూముల ధరలకు రెక్కలు..
రాష్ట్ర ప్రభుత్వం ముచ్చర్లలో కొత్త నగరం అభివృద్ధి చేపట్టినట్లయితే ఆ పరిసర ప్రాంతాల్లో భూముల ధరలకు రెక్కలు రానున్నాయి. ఇప్పటికే ఔటర్ రింగ్ రోడ్డు దాటి రియల్ ఎస్టేట్ విస్తరించిన సంగతి తెలిసిందే. ఇప్పుడు ముచ్చర్ల నగరం ప్రకటనతో ఇళ్లు, భూముల ధరలు ఒక్కసారిగా పెరుగుతాయని రియల్ ఎస్టేట్ వర్గాలు చెబుతున్నాయి. ప్రధానంగా ముచ్చర్ల సమీపంలోని దాసర్లపల్లి, కడ్తాల్, నేదునూర్, కందుకూర్, మిర్ఖాన్‌పేట్, తుమ్మలూర్, మహేశ్వరం, గూడుర్, పంజగూడ, నాగిరెడ్డి గూడ, మక్త మదారం, కొత్తపేట, షాద్ నగర్ వంటి ప్రాంతాల్లో భూముల ధరలు పెరగనున్నాయి. ఇవన్నీ ముచ్చర్లకు నలువైపుల ఉన్న ప్రాంతాలు.
స్కిల్ సిటీ ఏర్పాటుతో ఆ ప్రాంతంలో..
రాష్ట్ర ప్రభుత్వం కొడంగల్‌లో స్కిల్ యూనివర్సిటీ ఏర్పాటు చేయనున్నట్లు తెలిపింది. ఈ మేరకు ప్రభుత్వం ప్రతిష్టాత్మకంగా చేపడుతున్న ఈ స్కిల్ యూనివర్సిటీ బిల్లును రాష్ట్ర ఐటీ, పరిశ్రమల శాఖ మంత్రి శ్రీధర్ బాబు అసెంబ్లీలో మంగళవారం ప్రవేశపెట్టారు. ఇది ప్రభుత్వ ప్రైవేట్ భాగస్వామ్యంతో ఏర్పాటు కానుంది. ఈ యూనివర్సిటీ ద్వారా రాష్ట్రంలో ఆర్థికాభివృద్ధితో పాటు ఉద్యోగ కల్పిన దిశగా సర్కారు ముందడగు వేసినట్లు మంత్రి పేర్కొన్నారు. బిల్లుకు గురువారం ఆమోదం లభించింది. స్కిల్ యూనివర్సిటీ ఏర్పాటు ప్రకటనతో ఇప్పుడు కొడంగల్ చుట్టు పక్కల ప్రాంతాల్లోనూ ఇళ్లు, భూముల ధరలు మరింత పెరగనున్నాయి. కొడంగల్, అంగడి రాయ్‌చూర్, బొంరాస్బేట్, యాలాల, తాండూరు, పరిగి, కుత్భుల్లాపూర్, చేవెల్ల వరకు భూముల ధరలు పెరగనున్నాయి..