హైదరాబాద్ వాసులకు పోలీసులు మరో అలర్ట్ ఇచ్చారు.
నగరంలో ఎదురవుతున్న ట్రాఫిక్ సమస్యలను పరిగణలోకి తీసుకుని.. కొత్త నిబంధనలు అమల్లోకి తీసుకొచ్చారు.
అయితే.. నగరంలో.. భారీ వాహనాలు యథేచ్చగా తిరుగుతున్నాయని.. తద్వారా మిగతా వాహనదారులకు తీవ్ర ఇబ్బంది ఎదురవుతుందని పలువురు నగరవాసులు పోలీసుల దృష్టికి తీసుకొచ్చారు.
ప్రైమ్ టైంలోనే భారీ వాహనాలు రోడ్లపై తిరుగుతుండటంతో ట్రాఫిక్ జామ్ ఏర్పడి.. ఆఫీసులకు వెళ్లే వారికి, స్కూళ్లు, కాలేజీలకు వెళ్లే వారికి ఇబ్బందిగా మారినట్టు పోలీసుల దృష్టికి వచ్చింది. అంతేకాకుండా.. ట్రాఫిక్ సమస్యతో పాటు ప్రమాదాలు కూడా జరుగుతున్నాయని పోలీసులు గమనించారు.
ఈ నేపథ్యంలోనే హైదరాబాద్ పోలీస్ కమిషనర్ తాజాగా కీలక నిర్ణయం తీసుకున్నారు.
ట్రాఫిక్ రద్దీని తగ్గించటంతో పాటు ప్రమాదాల నివారణకు నగరంలోకి పలు వాహనాల రాకపోకలను రద్దు చేస్తూ పోలీస్ కమిషనర్ కొత్తకోట శ్రీనివాస్ రెడ్డి కీలక ఆదేశాలు జారీ చేశారు. ఈ నేఫథ్యంలోనే.. భారీ వాహనాలు, నేషనల్ పర్మిట్ లారీలు, లోకల్ లారీలు, డీసీఎంలు, వివిధ రాష్ట్రాల నుంచి వచ్చే ప్రైవేటు బస్సులపై ఆంక్షలు విధించారు. లోకల్ లారీలు, భారీ వాహనాలకు.. ఉదయం 7 గంటల తర్వాత నగరంలోకి ఎంట్రీ లేదని నిబంధనలు జారీ చేశారు.
ఇఖ.. వివిధ రాష్ట్రాల నుంచి హైదరాబాద్ వచ్చే ప్రైవేటు బస్సులకు ఉదయం 8 గంటల తర్వాత నగరంలోకి ఎంట్రీ లేదని ఆదేశించారు. ఉదయం 8 గంటల నుంచి రాత్రి 10 గంటల వరకు ప్రైవేటు బస్సులను నగరంలోకి అనుమతి ఉండదని స్పష్టం చేసేశారు. నగరంలోకి భారీ వాహనాలు రాకుండా ప్రత్యామ్నాయ మార్గాలను తీసుకోవాలని ఆదేశించారు. రాత్రి 11: 00 గంటల నుంచి ఉదయం 7 గంటల వరకు సామాగ్రిని తరలించే స్థానిక వాహనాలను అనుమతిస్తామని పేర్కొన్నారు. నిబంధనలు అతిక్రమించిన వాహనదారులపై చట్టపరమైన చర్యలు తీసుకుంటామని హైదరాబాద్ సీపీ కొత్తకోట శ్రీనివాస్ రెడ్డి హెచ్చరించారు. హైదరాబాద్‌లోని 94 మార్గాల్లో ఈ నిబంధనలు వర్తిస్తాయని సీపీ వివరించారు.
కేటాయించిన సమయానికి మించి భారీ వాహనాలు నగరంలోని రోడ్ల మీద తిరుగుతున్నాయని.. పోలీసులకు ఇప్పటికే పలు కంప్లైంట్లు వచ్చాయి. ఇక.. 2 రోజుల క్రితం హబ్సిగూడలో లారీ ఢీకొని ఓ పదో తరగతి విద్యార్థిని మృతి చెందిన ఘటనకు కూడా ఇదే కారణమని స్థానికులు విరుచుకుపడగా.. పోలీసులు ఈ నిర్ణయం తీసుకున్నట్టు తెలుస్తోంది.